قصيدة عن ست الحبائب

--------------------------------------------------------------------------------
قصيدتي زاد بعيوني جمالها
وأخذت أنقي بالمعاني جزالها
وأكتب معانيها من الشوق والغلا
لإمي وانا أصغر شاعر من عيالها
كتبتها في غربتي يوم رحلتي
لما طرى لي بالسفر ماطرى لي
امي وانا بوصف لها زود حبها
وان ماحكيت لها قصيدي حكى لها
امي لها بالجوف والقلب منزله
مكانة ماكل محبوب نالها
أقرب من ظلالي وانا وسط غربتي
وانا تراي اقرب لها من ظلالها
ماشافت عيوني من الناس غيرها
ولا خلق رب الخلايق مثالها
أغلى بشر في جملة الناس كلهم
وأكرم من يدين المزون وهمالها
أتبع رضاها وأرتجي زود قربها
واللي طلبته من حياتي وصالها
الصدق مرساها والاشواق بحرها
والعطف واحساس الغلا راس مالها
أهيم فيها وابتسم يوم قلبها
يسأل وانا قلبي يجاوب سؤالها
وان طلبتني شيء فزيت مندفع
اموت انا واحمل تعبها بدالها
اصبر على الدنيا والاحزان والتعب
واحمل على متني فطاحل جبالها
واسهر واعذب راحة القلب بالشقا
واعيش اعاني بس يرتاح بالها
تربية ابوي اللي على الطيب بذكره
اللي وهبني للحياة ومجالها
نور لي دروبي وانا طفل مبتدي
حتى تركني واحد من رجالها
الوالدين اولى بالاحسان لاجلهم
واولى بتكريم النفوس وعدالها
اقولها وانا على الله متكل
والله عليم بقدرتي واحتمالها
ياكلمة اغلى من الناس كلهم
ياشمس بقلبي بعيد زوالها
يافرحة تملي الكون باكمله
ياشجرة تكبر ويكبر ظلالها
تضحك لي الدنيا ليا شفت زولها
مثل السماء تزهي بطلة هلالها
والبعد عنها ياهل العرف ماقدره
لاشك ناري زايده باشتعالها
مااعيش ببلاد ولاهي بارضها
ولا بي عيوني كان ماهي قبالها
أرض تدوس بالاقدام رملها
أموت فيها واندفن في رملها

زائر

شكككككككككككككرا جزيلا يا شيخه صانعه

القصيده عن ست الحبايب لم تفييها حقها بالقدر الذي تستاهله ست الحبايب

والكلمات في غايه الروعه والاختياار موفق الطرح رائع منك

دمتي لنا بالعطاء والجهد الطيب

تحياتي لك تقبلي مروري

مرورك هو الاروع سلمت على ردك المتواضع لك مني فاقة التقدير

زائر

كلمات في منتهى الروعة

لقد استمتعت كثيرا بقرائتها وتأملها ,

دائما كما أقول, مهما كتبنا و مهما عبرنا لن نوفي وصف مشاعرنا اتجاه أمهاتنا

يعطيج العافيه حبيبتي عالطرح المميز منج ولا عدمنا جديدج الروعه
دمتي بود